وطني غنانا ليك وعشانك
كلمة حق وعلي ألحانك
وسط الخوف والموج العالي
احنا بنوصل بر أمانك
من الأغاني الجميلة والمؤلمة اللي اتعملت علي غِرار أعظم أوبريت عن ( التوحيد العربي ) مش ( الوحدة ) العربية
مستني آرائكم
وطني نصيبي الوطن الأكبر
يوم ورا يوم أزماته بتكبر
وإنكساراته مليا حياته
وطني بيُنهب وبيُستعمر
سراج
وطني ياحارق حُبك قلبي
وطني ياهم الشعب العربي
ياللي هويت بالوحدة الكبري
بعد ما شُفت جمال الثورة
وانت غريب .. صوتك بعيد
عن الوجود كله .. عن الخلود كله
ياوطني
جيهان
صعب ياجرح يامالي قلوبنا
صعب ياحلم ومات ف حياتنا
ساكته ياجامعة ياخدعة شعوبنا
فاشلة ياأسوأ شئ ف حياتنا
ياخلاف دايم بين أخين
بين إيران وبين البحرين
ف العراق ودمشق وجده
نفس الغنوة لأتعس وحدة
فرقة كل الشعب العربي
أسرار
قوميتنا اللي بنمحيها
اللي حياتنا دمار حواليها
ياوطن حارق أهله وناسه
جنة بينعم فيها أعاديها
شوفوا العراق بعد العدوان
وبكره سوريا والسودان
سكت الشعب وخطوته تاهت
ضاع الحق وكفته مالت
لما اندفن الحلم العربي
إكرام
وطني يا أغني وطن في الدنيا
وطني يا ممنوع م الحرية
ياوطن مسلوب مدخراتك
ياللي ف ايد الشر ضحية
الصوت صوتك ناطق غربي
لا صوت شرقي ولا صدى عربي
ياللي بتُنهب قدام عيني
ياللي ف قلب الذل راميني
انت نصيبي ياوطني العربي
إنجي
وطني ياراضي علي استعمارهم
وطني ياشارب كل مرارهم
ليه بتخيب ظننا فيك
ليه بتخاف انك تواجههم
الاستعمار وياك دي بدايته
بيك راح يجي زمانه ووقته
في لبنان والسودان
بيقسم جيش الطغيان
ودا من صمت الشعب العربي
نورهان
وطني ياثروة حيتان ناهبينها
وطني ياغنوة الغرب ساجنها
امتي كرامتك ترجع ليه
مدخراتك مين هيصونها
وطني يامنهوب عزه وخيره
ياوطن باني المجد لغيره
ياملكش ف اي ريادة
ياوطن كله هوان وبلاده
وطن السلب الوطن العربي
اسامة
وطني يازاحف لإنكساراتك
ياللي حياة الذل حياتك
ف دارفور وغزه الحاير
لسه هتكمل تصفياتك
احنا وطن علي طول متهدد
احنا وطن يلطم ويعدد
وطن الشجب الوطن العربي
وطني غنانا ليك وعشانك
كلمة حق وعلي ألحانك
وسط الخوف والموج العالي
احنا بنوصل بر أمانك
من غير دوشة ولا شعارات
زمن اليأس اهو عدى وفات
شمر يلا وإبني معانا
فجر طاقة نور جوانا
تجمع كل الشعب العربي
وطني تعالي نعيد حسابتنا
يالا نعوض كل ما فاتنا
ايد علي ايد وبفكر جديد
نحمي ترابنا ونبني حياتنا
افتح يلا كل حدودك
حدد هدفك واعلي بصوتك
لسه طريق المجد ف ايدك
حقق يالا كل وجودك
واجمع كل الشعب العربي
الشاعر محمود عبد الله
1 التعليقات
للاسف لسان حالنا
إرسال تعليق