فيديو : ايوه بغير - هشام الجخ قصيدة جميلة

هشام الجخ من الشعراء الشباب المُحترمين واللي دخلوا السكة من الباب الصح ..

قصيدة خفيفة جداً اسمها - ايوه بغير

أيوه بغير

أيوه بغير

لا انا نقصان ولا ضعفان ولا مسطول ولا سكران ولا زايغ من عيني الضي

ولا حد احسن من ف شي

بس بغير

واللي قالولك غيرة الراجل قلة ثقة أو قلة فهم

خلق حمير !

غيرة الراجل نار في مراجل

نار بتنور مبتحرقش

واحنا صعايدة منستحملش

شمسنا حامية وعرقنا حامي وطبعنا حامى

واللي تخلي صعيدي يحبها

يبقي يا غُلبها

أصلنا ناس علي اد الطيبة

كلنا هيبة

والنسوان في بلدنا جواهر

طب لو عندك حته ماس

هتخليها مداس للناس ؟

ولا هتقفلي اوضة عليها بميت ترباس

يمكن حتي تأجري ليها جوزين حراس

يبقي لا انا غافل ولا جاهل

كل الفرق ما بيني وبينك اني صعيدي

ينعل أبو دا اليوم الأكحل اللي لا ليه آخر ولا أول

اللي طلعت لقتني صعيدي

لو كان بايدي

كنت اعملك هندي بريش

واقلب شعري كانيش كرابيش

والبسلك سلسلة متدلدلة خرزة وقلب

بس ازاي ألبسلك سلسلة هو انا كلب ؟!

ثم العبرة مهيش ف اللبس

أصل المشكلة مش ف اللبس

أصل المشكلة عندك عندك

قلت اسيبها وبكرة تحس

بعده تحس

بعده تحس

دا انا لو جبس كنت زعقت

ماشي صداقة وماشي زمالة

بس مجتش علي الرجالة

مهي نسوان الدنيا كتير

وانا مبقولش تخاصمي الناس

ولا تتحجبي عن الرجالة

ولا تعتكفي وتسكني دير

بس ياريت حبة تقدير

إني بحبك

وإني بريدك

وإني زرعت حياتي ف ايدك

وإني غزلت بنات الدنيا عقود علي جيدك

واني تعبت من التفكير

واني بغير